ती अर्थमन्त्री, जसले बजेटको सूचना चुहाएपछि राजीनामा दिए

 ह्यु डाल्टन

बेलायतमा सन् १९४७ नोभेम्बरमा लेबर पार्टीका तत्कालीन चान्सलर ह्यु डाल्टनले बजेट भाषण गर्न हाउस अफ कमनको हलमा जा“दै गर्दा सञ्चारकर्मीलाई बजेट लिक गराएका थिए । डाल्टनले प्रस्तुत गर्नु २० मिनेटअघि नै द स्टार पत्रिका (अहिले बन्द भइसक्यो) ले बजेटका सूचना प्रकाशन गरेको थियो । यो घटनालाई ‘डाल्टन लिक’ भनिन्छ । प्रस्तुत हुनुअघि नै बजेटका सूचना चुहिएपछि डाल्टनले बजेट भाषण गरेको भोलिपल्ट राजीनामा दिएका थिए । त्यसपछि संसारभरि नै बजेटका सूचनालाई अत्यन्तै संवेदनशील रूपमा लिइन्छ ।
संसद्मा बजेट प्रस्तुत गर्नुअघि ह्यु डाल्टनले द स्टारका संवाददाता जोन कार्वेललाई भनेका थिए, ‘सुर्तीमा थप छैन, बियरमा एकदमै थोरै, कुकुरहरू र स्विमिङ पुल (सामान्य लक्जरी)मा थपिएको छ, घोडाहरूमा (घरपालुवा जनावर) लगाइएको छैन । खरिद करमा वृद्धि छ, तर अन्यमा फेरबदल छैन, लाभकर दोब्बर पारिएको छ ।’
द स्टारमा समाचार प्रकाशित भएपछि बजेट भाषणको भोलिपल्ट डाल्टनले प्रधानमन्त्री क्लेमेन्ट एटलीसमक्ष राजीनामा दिए । तर, प्रधानमन्त्रीले उनको राजीनामा स्वीकृत गरेनन् । सोही दिन डाल्टनले संसद्मा आफ्नो लापरबाहीबारे गहिरो क्षमायाचना गरे । डाल्टनले क्षमायाचना गरेकोमा तत्कालीन विपक्षी दलका नेता विन्स्टन चर्चिलले समेत प्रशंसा गर्दै सहानुभूति व्यक्त गरेका थिए । त्यही सा“झ पुनः डाल्टनले राजीनामा दिए र प्रधानमन्त्रीले स्वीकृत गर्दै सर स्टाफोर्ड क्रिप्सलाई नया“ अर्थमन्त्री नियुक्त गरेका थिए ।